舊日的足跡...

二千零三年一月

日期
心情,事件

30/01/2003

 (星期四年廿八)

年廿八啦,大家係唔係忙於大掃除呀?其實而家已經無以前既新年氣氛,記得細個時,我都好著重新年架,覺得一定要買新衫,但係人大了,已經很多年唔會為左新年而買新年,不過儘量都會購置一些有新年氣氛既野,如揮春等。

真係好消息,最近得知原來舊屋那裡不用拆平台頂,只要拆去一部份平台廚房位及花盆架便可,母親大人得知,立刻笑逐顏開呢∼過了新年,我們便會找師傅去拆廚房位,給在屋內造返個廚房,及做一些室內裝修呢∼

得知細妹在這經濟唔好咁時候,公司重加人工,大家都覺得很意外,真是新的一年新既開始,好消息好消息^^ 咁,我細妹成日都為公司開OT都值得啦∼

昨夜提早去了維園行花市,氣氛算不錯,不過睇既人多,買野既人就少呢∼ 最熱賣的都算是火箭吧,很多小朋友大朋友都會手拿一支,在空地上玩得興奮呢^^

26/01/2003

 (星期日)

又到月尾了,很快便新年,大家有無大掃除呢?我們家就找家務助理來幫手清理家居呢^^ 家裡又變得乾淨,別人又有工返,真係幾好架∼

今早有一位病人昨天請假回家休息,怎料今早起床時覺得很頭暈,便叫十字車,送了急症醫院,後來打電話來我們病房,問可不可以出院再來,我們再次解釋,今次當我們出院,而佢地入院,我與他的仔說,倒不如查清楚什麼事,這是現階段最緊要做的事嘛,他都接受了,希望他的爸爸沒事吧∼

至於拆平台頂的事宜,現正等待批准延期呢,不過,無論如何,我們都不會新年前或新年中開工呢∼

22/01/2003

 (星期三)

講番出院病人要護理人員送回家的事件,最近聽到消息話,呢個安排係不對既,咁大家聽到後,都放心些,因為,大家都驚下次又有咁既安排呢!

已經問左建築師事務所拎圖則,哦,原來一睇,我地有幾處要拆呢!原來,我地一路都用緊公家既地方架,平台有少少地方係公眾地方黎既,另外,我地要拆平台頂及拆一部份牆壁,亦要拆屋企前面既花架仔,此外,由於我地個廚房一路都o係o個個公家地方,我地要將個廚房移入屋內,到時一定好混亂呢^^

而家我地要寫封信要求延期,希望會被批准呢∼

16/01/2003

 (星期四)

真係峰迴路轉,上次講到有個病人唔肯出院,上頭經開會要我地一位護士同一位健康服務員送佢返屋企,我上次講到好擔心我d同事有事,點知事情有新發展,不過對病人都唔係好事,就係病人上星期日下午突然抽筋,要立刻送往急性醫院,就係咁件事就好似解決左啦!

雖然件事睇落好似解決左,但係仍然存在好多問題,例如:會唔會再有下次機會要我地送病人出院呢,我地擔心既問題係人生安全問題,家人唔願意接病人回家,而我地夾硬送病人回家,佢地會唔會突然發難呢?在送回家時,病人突然情緒有問題,咁我地可以點做呢?而,實際既問題係,既然病情穩定,點解要醫務人員送病人回家呢?種種問題,令我地覺得有少少唔開心及憤怒呢!希望,上頭可以好好討論一下呢!

昨天,舊屋唐樓那裡接到通知,要我們三月底前拆掉平台的天花,真是一件很麻煩既事,因為我地的廚房位於平台,我地除左要拆掉天花,還要重新在屋裡做個廚房呢!真令人傷腦筋呢!不過,母親大人話要過左年先可以拆,因為正月係唔可以動土呢!唔知有乜野要注意,大家記得話比我知呀!

10/01/2003

 (星期五)

又一個星期尾了,時間真的過得快,星期三聽過董特首既施政報告,唔知大家個心點諗呢?諗起又減薪又加稅,真係壓力大啦,更加唔敢消費呢,你地話係唔係?

呢排病房好多病人都唔肯出院,其實經濟差,令到有很多出院問題的病人,佢地好多原因都係無錢,請唔到工人,或者唔肯去老人院,一係就要去政府老人院等等...

有一個病人住上幾個月,佢有四個仔,但係都唔肯同社工合作,都係唔肯出院,而家開左好多次會,上頭決定要我們call十字車,送佢返屋企,咁送o個日重要我地一位護士同健康服務員同行,真係唔知出院o個日會唔會發生乜野事,真係令人擔心我地同事既人身安全...希望無特別事發生呢!

06/01/2003

 (星期一)

昨天與一大班網友一起去行麥里浩第五、六段,這兩段不是很難行,於是大家就計劃今次行山兼野餐,其中兩位網友特地帶了煮食爐具,而其他網友分別帶食物,大家便高高興興在山上煮食野餐呢!

起初,我們與其他網友失散,大家在不同地方等候,幸好終於也能在中途站遇見呢!行到兩點幾三點,我們先到達野餐地點,大家都很肚餓,所以很快地將所有食物吃掉,真厲害呢∼

今次,我還邀請了中學同學及她的男友一起行山,希望將來的行山日子,他們也會參加呢^^

01/01/2003

 (星期三)

新年快樂 ^^ 心想事成 ^^

眨下眼又一年啦,大家有乜新年願望,又有乜野計劃呢?我既願望就係快d完成個課程,到時想做乜都可以了^^

上星期沒有寫日記,等我o係度講下我做過乜先^^ 

十二月廿八日,與一大班網友BBQ,然後大家傾下日本旅行的事,傾傾下便十二點幾了,由於我o個日返早,之前o個晚又訓得唔好,我BBQ完之後真的很倦..沒有太參與大家的討論..最後,與他們吃完糖水,乘搭小巴回家,可能那夜真的很冷,大家都沒有開窗,因為太悶熱的關係,我感到很不舒服,終於支持到回家,便嘔吐啦...

十二月三十一日去了葵芳睇戲,睇金雞,係一套很好笑的戲,在場每個觀眾都睇得很投入呢^^ 然後,便去了騰龍墟倒數,可惜氣氛麻麻呢^^

好了,在此祝大家新一年開開心心,搵多d錢^^